蔡卓妍（阿Sa）自爆出瞞婚再離婚後，是非接踵而至，近日盛傳她有意飛甩一手捧紅她的英皇，拒加簽合約，令公司不滿。雖然阿Sa已澄清與公司仍有一段時間才約滿，但近日其公司力谷新樓盤，鍾欣桐（阿嬌）和容祖兒力撐到底，惟獨一向愛置業投資的阿Sa沒有入市，並推說母親對置業挑剔有要求，大倒老闆米。
蔡卓妍、鍾景輝及出爐金像獎最佳導演陳德森等昨日到港台擔任「香港電台節目獲獎祝捷會」的頒獎嘉賓，表揚過去一年港台所製作的節目在世界各地共獲78個獎項。
穿上厚底高踭鞋示人的阿Sa心情大好，其實自從她爆出秘婚再離婚後，是非一直纏繞她，近日更盛傳約滿的她將密謀過檔，飛甩一手捧紅她的英皇，消息更指她扭計拒加簽合約，令公司非常不滿，加上其公司的樓盤「維壹」將推出，公司上下藝人自然瞓身支持，當中她的Twins好拍檔鍾欣桐和容祖兒已力撐到底，先後購買了一個單位，反而未見一向愛置業的阿Sa出手，連日前的樓盤宣傳活動她也缺席，只得阿嬌撐場。
指母親挑剔
阿Sa自言仍未睇到心水樓盤，並將原因推給母親，指母親物色的物業面積較細，當她得知老闆楊受成給不少折扣藝人時，即說：「可唔可以再多啲，等吓諗吓，個盤都幾吸引，老闆都有介紹畀我，但媽咪買樓有佢自己條件符合，都幾挑剔，佢信風水，又要睇夾啲乜，好麻煩，其實我住邊都冇所謂，但買唔起house囉，自己都係要供，如果太貴，就要諗清楚，我屋企人好穩陣。」不過阿Sa暗示現時有近五個物業作收租之用，可說是圈中的富婆。
此外，阿Sa自言很想嘗試做DJ，但因為沒有急才，所以需要找一個好拍檔。她自爆讀書時經常打電話上電台問明星問題，當中試過問風火海和郭富城問題。
阿Sa說：「我問風火海如果三個同時鍾意同一個女仔會點，至於郭富城就問佢游水時會唔會除衫，因為覺得佢好大隻。」
採訪、攝影：駱華齡