去海洋公園玩可以住埋園內就一流，但要等公園起好酒店睇怕都要幾年後嘅事，退而求其次可以住喺公園附近嘅酒店都唔差。好似下禮拜開始試業嘅華懋集團旗下全新嘅L'hotelIslandHotel（南灣海景酒店），落戶喺黃竹坑道55號，行路去海洋公園都係10幾分鐘腳程。小妹噚日去咗間酒店吓啲環境得唔得。
有穿梭巴到海洋公園
入到酒店lobby，格局有啲似精品酒店，華懋集團酒店發展及營運總經理Sylvia話，酒店樓高37層，有成432間房，設計走新世代高科技風格，「我哋全幢酒店都用到Wi-Fi，每間房內置咗internetradio嘅iPod/iPhone喇叭。」Sylvia話，新酒店選址黃竹坑，係睇中呢度寧靜環境，客房望山望海都有；酒店又同海洋公園合作推出酒店加公園入場票套餐，酒店設有Shuttlebus行走公園、銅鑼灣等，「家住客買海洋公園門票有九折。」Sylvia話，啲客想喺附近shopping都冇問題，走去鴨脷洲啲outlet掃名牌服裝都好方便。
小妹上去酒店最頂層嘅套房參觀，企喺露台望晒南區景色，一邊睇避風塘，一邊就睇到海洋公園嘅升空氣球同上山纜車。Sylvia話，7月前試業期間優惠房價600蚊，包埋早餐，比正價平一、兩成，但係泳池同健身室暫時未開。查詢39688888。
電郵：mailto:[email protected]