5.16公投日，對香港民主運動意義重大，喺呢個咁特別嘅日子，仲有罕見嘅天文奇景助興。嗰晚夜空會上演「月掩金星」，傍晚7點37分開始，光亮嘅金星慢慢貼近月亮右上方，好快走到月亮後面，至8點01分月亮移開時，金星先再蒲頭。
煲呔肖猴 相冲黑上黑
月掩金星其實同香港好有關係，對上一次係1984年，中英兩國就喺當年簽署《中英聯合聲明》，而下次就要到2023年先再出現；唔想等到嗰時都未有真普選？5.16記得出嚟投票，爭取真普選、踢走功能組別。
堪輿學家麥玲玲話，雖然睇唔到呢個天文現象對公投有乜嘢特別啟示，但嗰日係「收日」，屬於一個唔差嘅日子，一切順利，「對交易算係中吉日子」。唔通預示公投會有好結果？
玲玲師傅又話，嗰日冲肖猴嘅人，而煲呔曾係「馬騮佬」，今年又嚴重犯太歲，嗰日即係黑上加黑。佢話，領導人犯太歲，嗰個地區政局特別不穩，會好論盡，「多勞少得，決定錯誤」，最好少蒲頭，多啲離開香港，「留喺度會多事幹」，佢建議煲呔辦喜事冲喜吓。煲呔一早話唔想投票，唔知佢嗰日會唔會借頭借路借呢個藉口匿喺禮賓府，唔出嚟投票呢？