踩單車試慳電芒　13秒有嘢睇

今時今日，乜都講綠色生活、環保，而電腦因為經常長開，好自然在耗電上要精打細算，最近BenQ就推出超慳電嘅LED顯示屏SlimV系列，究竟有幾慳電呢？我哋實試過，原來只要將踩單車13秒所花嘅電能，就夠推着佢，夠慳電未？

記者：許福合
攝影：伍慶泉
Model：Algie@PureModels

輕鬆踩着個芒

BenQSlimV屏幕當然唔係設計成要踩單車推動，我哋喺BenQ協助下，借來一部可將單車轉動時嘅動能，轉換成電力嘅器材，簡單啲講就係一部微型動能發電機；而單車亦係普通一架街車，全程測試會使用相同波段。我哋首先接上一隻18.5吋嘅SlimV作測試，由ModelAlgie試踩，經過大約13秒，就見到屏幕已經亮起，有畫面睇喇。
我見Algie咁輕鬆，立即換上隻21.5吋型號試吓效果，今次要踩耐些少，大約17秒先有畫面睇，正如Algie話：「隨便踩一陣個芒就着，一啲都唔辛苦！」既然係咁，再駁個舊款LCD屏幕，諗住作個比較，呢次Algie無論點踩，個芒最多都係閃閃吓，踩極都無畫面睇，最後只好放棄。經過呢次實試，先知道原來LED可以咁慳電，麻煩仲用緊舊芒嘅朋友仔，為咗地球着想，快啲升呢啦！

Eco慳電66%

一般22吋LCD內嘅屏幕，按尺寸不同，耗電量會由80W同120W不等；SlimV就明顯慳電得多，例如21.5吋V220H，最大耗電量係25W，而18.5吋嘅V920就更只需18W。LED之所以比較慳電，係因為傳統LCD依靠CCFL冷陰極螢光燈管發光，耗電量較高，而LED以內置發光二極管發光，本身具有省電、高效、發光均勻嘅特點，相比下可節省44%電力。
此外用家更可動用Eco省電場景模式，打開之後，電力消耗會進一步降低，可節省電力由44%提升到66%，不過在使用Eco時，屏幕會明顯比較暗，比較適合較暗嘅環境使用，夜晚熄晒燈睇反而無咁刺眼㖭。