有媒體昨日翻炒廣電總局就「41號文」通知，要叫停未經廣電總局批准嘅IPTV（寬頻電視），但最受影響嘅中國電信（728）同中國聯通（762），股價又唔見點大跌。
早喺上星期已傳出廣電總局同工信部兩大陣營，喺三網融合計劃上不歡而散，最終廣電局反枱想洗牌玩過。聽講係擔心營運商早將IPTV市場據為己有，打亂廣電局自己進入市場嘅部署。
簡單講，呢單消息可視為宮廷鬥爭。目前喺內地開檔搞寬頻電視，要有齊4張網上牌照，而廣電局就負責當中最重要嘅IPTV牌。家獲發牌嘅7間公司，6間係廣電系企業，而電訊營運商冇一間攞正呢個牌，惟有走法律罅，只負責網絡接入，內容就由合作夥伴提供。
廣電工信同室操戈
中電信近年力谷IPTV，全國已有超過362萬用戶，當中以廣東發展最成熟，去年更擴展至向高級酒店提供高清節目。監管之聲早已流傳，不過中電信喺消息公佈後仲繼續發佈上海高清IPTV同世博相關商用計劃，同廣電總局嘅角力升溫。
受事件影響嘅仲有TCL同康佳等大廠，佢哋已開始生產直接連機頂盒上網嘅寬頻電視，但央視早前踢爆呢啲電視可提供黃色資訊，更加觸動廣電總局神經，廠家嘅生產大計受阻，連市傳同湖南廣播電視台傾IPTV遊戲嘅騰訊（700）都受牽連。
家吓情況有啲似當年電訊產業重組，前景不明加上訊息混亂，相關股份經常大幅波動。呢次最唔同係廣電局本身既係發牌機構，又係營運商兼內容提供者，大權在握，但就未經歷整合重組，而且要協調各地電視營運商推廣高清、解決與地方開展IPTV業務嘅利益衝突，及網絡資訊安全把關問題。由此可見，短線持有電訊股政策風險較大，行業競爭也越趨激烈。
三網融合係按國務院要求，廣電及電訊「相互進入」大方向唔變，但融合初期梗有磨擦，要合作才能雙贏。既然前線打緊仗，投資者炒三網融合只宜退守大後方，受政策影響較低嘅手機設備股同有國家背景嘅節目內容供應商，係較佳換馬對象。
胡孟青