冰島火山爆發，呢件事對香港有乜影響？有人話火山爆到成個歐洲天空都係灰，呢樣有片睇，唔信都唔得，但仲話會吹到來香港，星俠就唔係好信。睇番轉頭，冰島火山爆發對香港最明顯之影響，只係交通航線出現阻滯，不過仲影響有公司要押後到挪威上市，所講就係太平洋恩利（1174）。
早在今年3月中，太平洋恩利旗下持有42%之中漁集團，已獲挪威奧斯陸證券交易所批准作第二板上市，但冰島火山爆發，導致航空服務中斷，故決定押後上市限期去到不遲於今年6月2日。點解一定要揀挪威？側聞奧斯陸證交所係世界數一數二之海產公司上市集中地，所以透過到當地上市，有提高太平洋恩利及中漁市場知名度，有助提升股價。
不過，恩利近月表現一般，連日在1.4元水平反覆，該股昨逆市炒上，一度升見1.45元，惜始終彈力唔係好夠，升幅隨即收窄到1仙，收1.42元，走勢受制主要平均線之下，恐要考驗2月底1.33元低位，博反彈唔易。
方星俠