近期熱爆全城，非兩個同樓市息息相關嘅「維壹」莫屬──英皇集團新盤「維壹」，同埋賭王愛女何超儀套《維多利亞壹號》！
雙胞胎性格完全唔同，後者係血腥到暈嘅恐怖港產片，係超儀用血控訴香港班地產商（即係佢老竇同埋佢老竇班friend）玩晒。
張堅庭帶friend幫襯
至於楊生個盤就sell溫馨甜蜜。點解咁講？楊生喺「9招12式」出台後第一個賣樓，個個金精火眼睇實佢有無犯規，更加八卦個盤會唔會變「明星盤」。家星味濃唔濃就唔知，但好快變成英皇系高級職員宿舍就千真萬確！
英皇噚日依足本子辦事，公佈有董事同埋董事親戚買咗維壹，分別係執董黃志輝同執董范敏嫦個大佬。黃生買咗18樓B室，面積895方呎，定價1313萬元；范生就買11樓A室，1536方呎，盛惠1911萬元。楊生兩個都有畀折頭，分別有1.5%至2%discount。聽聞楊生女婿張堅庭都有帶friend捧場，個friend仲買咗個單位，呎價成萬五蚊。
大拿拿成千幾萬撐老闆場，打工仔真係難做！
李華華
mailto:[email protected]