華懋嘅新酒店下星期試業，華懋集團執行董事兼管治委員會主席龔仁心噚日到酒店參觀，心情勁靚。佢話，對商人陳振聰就家姐龔如心千億遺產上訴官司好有信心；不過單官司明年初先審，家唔使咁心急。轉頭佢又解釋華懋唔係反對警方攞走陳振聰06年手持嘅遺囑，只係擔心警方做檢驗嗰陣唔小心破壞咗份遺囑，「呢份遺囑好重要，家只係上訴，仲有終審，只要警方同我解釋咗呢個疑慮咪得囉。」
龔仁心又好大方咁講，法官裁定華懋慈善基金要支付部份訟費都合理，尊重法庭判決。先贏一仗嘅龔仁心梗係氣定神閒啦，敗方陳振聰就要面對稅局追討3.4億元嘅稅款。稅局局長朱鑫源噚日話，唔評論個別案件，但重申睇風水嘅收入都要交稅。