主張溫和談判路線嘅「終極普選聯盟」成日俾政府抽水，一時又話大家分歧收窄，一時又話大家有得傾，但查實傾咗咁耐一啲成果都未有。與其俾政府抽水，不如開放抽水市場畀市民任抽唔嬲，普選聯噚日嘅反對政改爛方案遊行就吸引唔少「抽水黨」出現，唔少人更加係專程過海抽抽水。
謝偉俊做白姐姐跟班
人稱白姐姐嘅九龍西補選候選人白韻琴，可能以為噚日嘅白衣遊行係為白姓人士而設，所以無視愛郎（現任立法會旅遊界功能組別議員）謝偉俊係遊行人士「打倒」對象之列，竟以白衣情侶檔亮相，仲手執教協民主旗仔加入民主黨大隊，唔理身邊嘅民主黨人鬧佢抽水，事關抽水呢家嘢唔係你抽人就係人抽你喎，白姐姐係咁講o架。
主力狙擊毓民嘅白姐姐強調自己支持盡早普選，過往7.1遊行都有參加，係大家唔發現咋喎。唔通年年行7.1嘅八方真係眼大睇過龍，連白姐姐咁突出嘅人都發現唔到？謝偉俊就話「大時大節要返外家，畀白姐姐話吓事」，所以噚日全程做足大跟班。
澳門「抽水哥」07年爆紅後隱退，港版「抽水哥」或者可以乘勢登場。反對取消功能組別嘅港島區候選人黃興噚日身體力行示範如何阻擋普選前進，喺遊行隊伍起步行至近門口時，一度企喺路中心做人肉路障，唔少遊行人士大叫不滿後，佢先行埋一邊，仲喺一片反對聲中堅稱自己好支持呢個政改爛方案，唔係博出位係乜？
陳貝兒路過怕被誤會
近日罕有現身競選論壇嘅九龍西候選人張錦雄亦喺灣仔一段企街，呼籲選民支持佢呢啲「溫和派」。至於佢嘅好友、新界西候選人李世鴻就冇同佢拍住上做宣傳，坊間盛傳李世鴻報咗名後恍如人間蒸發，難道真係要到5.16補選正日先至現身？
有線娛樂台前主播一姐陳貝兒亦一度現身遊行隊伍中，原來佢只係路過被擠入人潮，唔係嚟撐遊行，所以一見八方舉機都急急腳行快兩步走人，以免被人誤會。
mailto:[email protected]
