坊間唔少專家都話，炒股只要揀到龍頭公司來買，前景肯定無衰，幾乎個個都講到信口開河變成真理咁款。不過，星俠份人偏鍾意挑戰，呢個世界凡事邊度有絕對？有無炒行業龍頭股一樣唔掂？梗係有。
龍源電力（916）係亞洲最大風力發電企業，其業務規模在內地當然亦都係佔最大塊，集團去年收入97.44億元人民幣（下同），增長14%，純利8.94億元，按年增1.65倍，成績固屬理想；不過，其股價表現卻認真不濟，自今年1月中升至11.18元後，呈現見頂走勢，最近更加反覆向下尋底，並屢創新低，話晒作為一隻龍頭股，呢款走勢真係令散戶不敢恭維。
發展低碳經濟或推動再生能源點講都好，都係得到國策支持，龍源前景應不用懷疑，若然呢輪股價係咁跌，係要反映當初以較高估值上市而要出現較深調整，咁似乎即使現價係呢個水平都難言見底，事關家陣現價市盈率仍在41倍，若然降到30倍樓下，股價明顯仲要跌得幾深，想撈呢隻股，真係可以嘆慢板唔使急。
方星俠