經過奧運及世博，中國喺舉辦大型國際性活動之實力有目共睹，隨着城市化步伐一步一步推進，將會有更多二三線城市有機會「升呢」，追上快速增長列車。城市化過程唔會一時三刻搞掂晒，正好係投資者物色具潛力股份作中長線部署嘅機會。
好多投資者不知不覺買入唔少同城市化相關嘅股份，例如手機設備、家電、汽車、地產股等，其實現時喺農村滲透率最低係家庭電腦。據國家統計局數字，每100個家庭，城市入面手機有170部、農村都有近80部，基本上已經相當普及，而電腦即使係城市入面，每100個家庭亦只有約60台，而農村更不足5台，同今時今日香港地人手一部Netbook或手機上網差好遠。
亞洲電腦商勢超前
根據研究機構Gartner發表之最新報告，首季全球包括桌面及手提之個人電腦付運量為8430萬台，同比增長27.4%，論市佔率惠普（18.2%）仍居首位，之後是宏碁Acer（14.2%）、Dell（12.1%）、聯想（992）（8.3%）及華碩（5.5%）。
然而若論增幅，則由華碩攞第一（按季增長1.14倍），聯想（59.3%）排第二，然後係Acer（54.3%）。未來由亞洲電腦商拉頭纜之勢顯而易見。目前內地人仍係最愛聯想（去年第四季市佔率增至33.4%），其次係惠普（14.1%）及Dell（8.3%）。
聯想股價有支持，個市近排走晒樣，佢仍屹立不倒，且出現明顯升軌。
聯想未來增長亮點係中移動（941）形容為1年後將超越iPhone嘅TD版OPhone手機，估計兩年後整體智能手機過億部。
OPhone最具殺傷力嘅地方係功能齊全而價錢平過iPhone一大截，售價都唔使兩千蚊人仔，堪稱價廉物美高智能，關鍵在於手機平台所用晶片；預期今年TD手機晶片市場規模達3500萬套。現時嘅OPhone係由中移動及聯想合作之「聯想01」，而聯想嘅「樂Phone」則與聯通合作，卻又指名道姓打iPhone，總之，江湖從此多事。
胡孟青