呢排港產片《志明與春嬌》hit到爆，戲入面張志明send畀余春嬌嘅sms更加成為城中最熱嘅金句。睇見《志明與春嬌》咁紅，連財經界紅人曹仁超噚日都忍唔住借嚟一用，佢話炒輪就應該好似春嬌咁，決定要快，五日內就要決定同唔同佢做人世，千祈唔好拖咁話喎！
買股係愛情長跑
曹sir話，自己平時好少睇戲，但最近就同太太睇咗一齣戲，因為齣戲個名同佢自己真名一樣，都係叫志明，仲自爆自己追老婆追咗八年先到手，好老套，唔似得志明與春嬌咁快手喎！
「春嬌第一日識佢（志明），就諗吓同唔同佢做朋友，第四日決定同唔同佢上床，第五日就問佢做唔做我條仔，唔做我條仔，我哋就散band，咁講即係五日情。呢個concept用喺輪（窩輪）嗰度係好好喎，股票嚟講呢，就好似我追我老婆咁，即係愛情長跑。」即係話如果（股票）係好女人，就不妨追耐啲。
不過，曹sir話，唔應該同股票做人世，炒輪都係一樣道理，大部份輪都係炒好短線，「炒輪應該好似楊千嬅咁，即係第5日就要決定做唔做人世，千祈唔好拖，如果唔啱呢，就fing甩嗰個，搵過另一個。」
李華華
電郵：mailto:[email protected]