《城市論壇》噚日傾房屋問題，既冇房屋政策官員出席，又冇保皇黨議員到場，只得馮檢基、涂謹申、測量師潘永祥同獅子山學會行政總監王弼做嘉賓，開頭冇乜火花，但王弼突然拎包寫住「珍惜寶貴生命」嘅炭出嚟，話當年政府首次置業貸款害死唔少人，好多人借咗錢買樓，後來變咗負資產，所以佢唔贊成政府重推首置計劃。馬草泥發言時就叫王弼不如攞包炭去燒雞翼。
被指唔接受批評
台下有個22歲年輕人又質問馮檢基，話佢做咗咁耐立法會房屋事務委員會成員，都解決唔到高樓價問題，令80後冇晒買樓希望。
阿基回應話，房委會委員先有份制訂房屋政策，立法會議員只係負責批評政策，冇份制訂政策，所以批評立法會議員冇用。
馬草泥忍唔住鬧馮檢基唔接受市民批評，可能係想做立法會主席想到上晒腦，仲衰過英國首相白高敦，「佢話個選民係老虔婆，都要道歉6次啦。你家唔接受市民批評，要落台至得。」