睇完西貢戶外中心之「明日之星飛躍計劃」，覺得香港特區每年倚靠社會人士之熱心捐助，出錢出力，為政府慳番唔少錢，但亦令到我哋明白，香港人出外參加奧運、亞運之類，爭獎牌其實不易，每一個金銀銅牌拗開，都有不少人之血汗，得來匪易。戶外中心內有不少殘疾人士之活動、測試等，好有心思，既要配合殘疾人士之體力、能力、殘疾限制，又要測試到佢哋之意志力、集中力，要專家先至識得諗。呢位專家就係博士S，佢在中大攞碩士，理大得體育生理學博士，為殘奧委做義工，設計種種不同之測試活動。據總幹事L講，風后李麗珊之得到奧運金牌，博士S係幕後功臣之一，因為佢與團隊努力分析一切風速、水速與風帆滑板之科學數據，用科技配合李麗珊之體能與特徵，改善李麗珊之海上表現，係幕後之無名英雄。
西貢係香港後花園，到此一遊，人都輕鬆一啲，靚太F話任何人要在西貢興建高樓大廈都要反對，我哋深有同感！
星期一返工，收到《蘋果》轉來一位老讀者「王翁」嘅信，王翁話退休多年，嗜好就係炒股炒匯與打網球，打到七十五六歲先至停打，之後每日收睇電視網球，尤其是直播節目，於是每日耳仔聽住新城財經台，隻眼睇住電視，一樂也。王翁投訴：
「近期NOW在報章刊登全版大廣告，大字標題是『一網打盡』並詳細解釋舉凡全年四大比賽，十場大師級賽多場世界巡迴賽，包含晒ATP與及WTA亦即男女子方面播齊，我看了這廣告非常愉快合晒口胃，殊不知兩個月來好多場女子大賽都冇得睇，好似最近期的IndianWell與及Miami的比賽也看不到，我只能在《蘋果日報》的『體壇速遞』（編按：『體壇速遞』應為『體壇傳真』）裏面看到結果，心中感到好失望！」
既然如此，左丁山順手就將封信傳真畀now電視負責人燦哥，燦哥即刻交畀now體育台總監賴汝正。賴兄來電云：「一啲網球直播喺670ESPN，676Eurosport，677EurosportNews做嘅，不在636網球台直播，請王翁留意，多謝王翁捧場！」