影音使團早排宣佈喺土耳其亞拉臘山搵到懷疑挪亞方舟殘骸，未夠幾日就爆出造假疑雲。美國宗教大學LibertyUniversity教授RandallPrice話佢曾經參加呢次探索，探索隊搵到嘅木材其實係由黑海附近運去山上，土耳其文化旅遊部長更加話，會調查點解有土耳其官員未經批准去香港開記招，同啲木材點運出境。
Randall嘅電郵近日被多個考古學網站引述，Randall話，有班庫爾德人話畀佢聽，佢哋曾經受聘將黑海附近嘅木樑運去亞拉臘山個山洞。佢又質疑，影音使團探索隊影到遺骸嗰啲蜘蛛網，根本冇可能喺4,000米以上環境存在。影音使團方面反駁，Randall喺08年參與佢哋嘅探索行動都唔夠一個月，佢根本冇去過遺骸地點。