五一勞動節工聯會晨早已經喺遮打花園搭晒台，畀工會代表發言，八方突然聽到司儀叫「唔揪得」上台，即刻望吓邊個唔揪得都夠膽上台，原來唔係唔揪得，而係工聯會理事長吳秋北，呢個爛gag，揭開遊行序幕。
大批吹氣棒等道具
工友手持橫額標語操上政府總部，嗌完一輪口號夠鐘食晏，眾人鳥獸散，人人好有手尾，順手將手上嘅吹氣棒、紙牌等遊行道具丟落路邊垃圾桶。呢次遊行工聯會報稱有2,500人參加，可想而知有幾多件示威道具，話咁快就餵飽中環唔少垃圾桶，多個垃圾桶食滯咗，「嘔」番啲吹氣棒出嚟，場面壯觀。
呢啲吹氣棒以前多數在紅館演唱會見到，純粹用嚟畀fans製造氣氛，十分無謂，被指係最唔環保塑膠產品，工聯會營造聲勢無可厚非，應該環保啲囉。