噚日接到老媽電話約小妹今日去飲茶，先記得下周日係母親節，自問有啲不孝，拿拿臨去咗旺角花墟繽紛園藝花店搵番紮花送畀阿媽。下晝見到花店人頭湧湧都幾熱鬧。小妹同繽紛園藝嘅客務大使珊姐識咗好幾年，即刻拉住佢問吓有乜好介紹。
珊姐笑笑口話，今年經濟好番巿況又真係幾好，花店都設計咗好多種類嘅母親節花束畀啲客選擇，無論係送畀潮媽、環保媽、傳統媽，總有一款啱心水。就算係啲小朋友想送畀媽媽，都有得揀，因為花店今年母親節特別設計咗啲58蚊至168蚊不等嘅慳家小花束，「小花束嘅花材有代表溫馨嘅康乃馨，同埋大大朵嘅太陽花，經濟得嚟又大體，女孩子仲可以買配上車仔嘅cuite花束。」
業界料銷路升兩成
佢又話，送畀潮媽，梗係要送BB粉牡丹配上BB藍繡球花嘅花束，加埋銀絨葉，潮媽揸喺手，入型入格。如果媽媽鍾意啲花可以擺耐啲，就選橙黃蘭花。講到格調高貴嘅母親節花束，珊姐介紹以盆栽種嘅盆花，花材包括粉百合、康乃馨、玫瑰、豆枝，「呢啲都係母親節選用嘅傳統花材，但加咗富有線條感嘅豆枝，格調明顯提升。」
問珊姐自己鍾意邊束母親節花，佢即刻攬住一束用咗桃紅康乃馨花束，並配上蕙蘭，「用咗桃紅康乃馨，傳統得嚟又有啲新意思，唔係一定要白色嘅康乃馨先靚靚o架。」佢話今年母親節花價同舊年差唔多，經濟好咗，預計銷路升兩成。
母親節部份花束行情
慳家之選 花材：小康乃馨、太陽花 價錢：58元
潮流之選 花材：BB粉牡丹、BB藍繡球花 價錢：390元
傳統之選 花材：桃紅康乃馨、蕙蘭 價錢：398元
環保之選 花材：粉百合、康乃馨、橙黃蘭花 價錢：450元
品味之選* 花材：粉百合、康乃馨、玫瑰、豆枝 價錢：880元
*屬盆花
資料來源：繽紛園藝
電郵：mailto:[email protected]