終審法院日前對室內禁煙範圍定義作出終極裁決，衞生署當然表示歡迎，控煙辦主管林文健話可以令執法模式更順暢，並會喺定期季度培訓，再一次提醒控煙督察應該如何處理室內禁煙投訴。
四年一度世界盃將至，又係酒吧大做生意嘅時候，今屆世界盃係新禁煙條例實施後首次賽事，林文健話會因應賽事日子，派出控煙辦人員到餐廳酒吧等地方派發新禁煙指引，提醒酒吧同顧客唔好室內吸煙。
至於會唔會擔心執法時多咗爭執，甚至危及控煙辦人員人身安全，林文健指大部份市民同場地負責人都採取合作態度，冇乜刁難執法人員，過去三年共有13宗控煙辦人員被襲擊個案，佢認為情況唔算嚴重。襲擊公職人員係好嚴重嘅罪行，林文健咁講，唔係暗示同事畀人打得少啩！