大銀行唔願做街坊生意，滙豐6月中會結束長沙灣元州街分行，改喺深水埗西九龍中心三樓開新分行，好多街坊都話十分唔方便，民協區議員覃德誠指元州街分行服務附近人口近十萬人，搬遷會令數以十萬計存戶受影響，日後要行多十幾廿分鐘先去到銀行，對長者甚為不便。
民協本來打算聽日帶隊逾百人去滙豐中環總行抗議，銀行收到風後聯絡覃德誠，好體貼咁提出反建議，不如唔好要啲長者舟車勞頓去中環，留在長沙灣示威好唔好？覃德誠同八方講，民協商量後，覺得唔去中環可能有更多街坊圍元州街分行，因此決定留守元州街。佢哋要求滙豐喺長沙灣區重置分行，唔好明恰小存戶。滙豐口惠而實不至，如果真係關心長者，唔想長者長途跋涉，保留現時分行仲實際啦!