IT界莫乃光喺網上發起要求海洋公園引入被稱為「草泥馬」嘅羊駝，令香港人同遊客開眼界，早前佢去信海洋公園主席盛智文，指現時中港網民皆十分愛戴羊駝，牠已成為內地各動物園主要台柱，吸引萬千網民朝聖，相信如果海洋公園引入羊駝，必定會令更多遊客入場。
佢又指內地唔少動物園都已經引入「草泥馬」，如果海洋公園諸多猶豫，隨時失去呢個增長入場人數嘅黃金機會。八方同唔少人一樣，覺得海洋公園養草泥馬機會不大，點知海洋公園日前竟然覆信畀莫乃光，表示感謝莫乃光同其他網民意見，會盡快回覆咁話。
海洋公園最終會唔會搵幾隻草泥馬嚟香港，暫時係未知之數，不過莫乃光認為係喜訊，至少海洋公園回應正面，如果盛智文有時間，可以當面同佢傾傾。