小妹每屆都會追睇世界盃，睇波又睇靚仔，但今屆有線大玩獨家，絕到連新聞片都冇世界盃睇。小妹噚日搵咗SonyPS3巿場部總經理James食晏（AA制咋）呻吓。佢叫小妹唔好咁勞氣，唔睇得啫打得喎，可以親自落場同其他亞洲區對手打番場。
首辦世盃亞洲打機賽
James話，佢哋啱啱出咗隻官方認可《2010FIFA南非世界盃足球賽》遊戲碟，集合全球近200隊國家和地區勁旅，香港隊都有，「新game嘅操控同畫質都遠勝過去世界盃game，新增敗部復活賽，可以選番以前世盃總決賽輸咗隊伍再打一場。」PS3仲首辦世盃亞洲打機賽，參賽國家和地區包括香港、印尼、馬來西亞、新加坡、泰國同韓國。香港玩家喺SonyStyle或指定分銷商購世界盃遊戲碟就可參賽。初賽喺呢個月22日同29日舉行，以淘汰賽選出四名代表，再同其他國家代表喺下月8日進行總決賽。詳情上 http://asia.playstation.com。
James即場同小妹示範打機秘技。佢話，個game嘅設計像真度極高，好似西班牙、巴西、英格蘭勁旅喺game內嘅實力比其他隊伍確實高一大截，「參賽者選隊伍一定要選強隊，如果揀香港隊，無論你打機技術點精，都係要輸波。」選擇咗出戰隊伍後要日日操練。要注意守門員識得衝出禁區搶球，「有危有機，趁佢出迎射波入門機會大好多。」
電郵：mailto:[email protected]