政府噚日宣佈市建局主席張震遠續任三年，另加入兩張新面孔做非執行董事，分別係前政務司廖本懷之子、建築師廖宜康同家具店「住好啲」創辦人楊志超。
被發展局局長林鄭月娥譽為「最佳公職人員」嘅張震遠，噚日再獲林鄭送高帽，指佢「高瞻遠矚，是一位不可多得的領導人才。」市建局被批評逼遷居民興建豪宅益地產商賺大錢，委任楊志超，唔知係唔係想改善形象令舊街坊住好啲。張震遠則話好欣賞楊志超活用香港地道文化，發揮好多得意產品，更大讚「住好啲」句口號DelayNoMore一流，日後市建局都可以借用，因為舊區更新重建都delaynomore。張主席平日不苟言笑，睇佢唔出原來咁鬼幽默。