原來新聞都可以有大結局。噚日無綫電視資深體育主播馮堅成，喺傍晚6點半新聞報道中讀完一分半鐘嘅體育新聞後，好愁咁講咗句：「好啦，6點半體育報道完喇，多謝收睇。」
呢幾句話，代表體育新聞喺星期一至五6點半時段成絕響，星期六、日照舊。
穿黑衣報道
佢嘅好拍檔伍家謙亦喺自己個微博留言，「這一刻還是要來臨，縱使早有心理準備，仍是感到難受，痛心疾首。我獨自在塞車時默哀了一分鐘。奠。」
噚日6點半新聞報道，馮堅成同其他兩個主播都穿黑衣上鏡，而馮堅成最後報道嘅係NBA新聞，講拓荒者同牛仔兩隊波喺季後賽出局，佢身後螢幕打出「別了！季後賽」幾個大字。TVB今次改傳統，好多觀眾似乎唔多接受，有網民批評無綫罔顧公眾利益，短短兩分鐘體育新聞都唔畀觀眾睇。