係呀！頭版揭到副刊，依然係世博，就像08京奧開幕，鋪天蓋地都Weareready！此刻上海人ready未？我唔知，但你要去一睹盛事，就必須ready。此刻仲同你講園區有幾大使咗幾多錢幾多國家參與等虛擬數字？實戰階段啦，講吓點用36個鐘頭玩盡世博仲好！
記者、攝影：曾一
模特兒：Suki@PureModels
鳴謝：康泰旅行社、上海半島酒店
海寶提提你！
門票分平日票及指定日票，指定日包括1/5-3/5、1/10-7/10及25/10-31/10等特別日子，票價RMB200；其餘為平日，票價RMB160；另有3日票RMB400，抵玩推介！
現場有Say
畫家周明龍：我未準備進園，趁未開幕專誠到正門前將中國館畫下，希望可將作品義賣，為玉樹災民募捐。
先遊浦東再遊浦西
世博展館太多時間太少，建議買張3日票，每日在場內玩足12小時。
3日票攻略
Day1
A片區：守至10pm閉園式
9am開園，首日當然由正門入，入場第一件事到門口預約機，預約今天參觀的幾個場館，再經世博軸到慶典廣場看開園儀式。
10am到B片區看主題館，推介城市地球館。
12nn放飯！到B片區中華美食街搵食。
1pm按預約時間遊中國館玩軌道車。
4pm按預約時間到日、韓、沙特等館。
8pm拍攝日韓等館夜景，有時間可守候10pm的閉園儀式。
Day2
C片區：TapasBar食晏
9am從長清北路出入口進館，或乾脆乘地鐵13號線到「世博大道站」，立即到預約機，預約英國、西班牙、瑞士、德國等展館。
10am先遊B片區的澳洲、泰國等館。
12nn推介到西班牙館tapasbar解決午餐，兼遊展館。
2pm按預約時間遊英瑞德等館，有時間可兼遊丹麥、俄羅斯館。
8pm亮燈後的英國海膽球自然是必拍對象。
Day3
D、E片區：睇埋大巡遊先走
9am早兩日一直在浦東，這天在浦西，從西藏南路出入口進館。預期D、E片區企業館較少人可免預約，上午參觀中國船舶館、中國航空館、城市未來館。
1pm午餐可於世界城市廣場食肆搞掂。
2pm遊可樂館、太空家園館、世博博物館。
5pm浦西園區5pm及8pm各一場有「未來創意」巡遊。
五大必玩場館
中國館：四方城10樓玩軌道車
試運時有人嗌一句：「中國人看不到中國館算甚麼道理？！」你知點解你要睇啦！主題是「城市發展中的中華智慧」，冠冕堂皇的話說得太多，總得親自到四方城下睇睇展館建築有幾宏偉，走入館內看看有500個人仔會動的立體《清明上河圖》如何結合科技與古典藝術，到10樓玩埋《尋覓之旅》軌道車，出來你算個中國人了！要有心理準備呢度會逼爆人，做好漢不易呀！
立體《清明上河圖》
Don'tmiss：立體版《清明上河圖》、《尋覓之旅》
位置：A片區（最近出入口：上南路）
瑞士館：坐纜車睇雪山巨人
唔係朱古力、軍刀，最期待係館內一條原裝由瑞士運來的登山纜車，可迅速從館底升至館頂，寓意從城市接通山區鄉郊，最啱行得攰想唞唞。還有一齣IMAX電影《阿爾卑斯：雪山巨人》，可預期用IMAX播的雪山景會有幾靚。
Don'tmiss：纜車、《阿爾卑斯：雪山巨人》
位置：C片區（最近出入口：L6渡輪碼頭、長清北路、世博大道站）
日本館：頂級機械人曝光
日本科技向來嚇人一驚，今次場館外形似有角蠶蟲，外牆以超輕發電膜覆蓋。將展出從未曝光的頂級機械人等未來科技。
Don'tmiss：結合崑曲及能劇的音樂劇、機械人等未來技術
位置：A片區（最近出入口：白蓮涇、L2水門碼頭）
沙特阿拉伯館：全球最大IMAX3D影片
石油國家財雄勢大，唔使驚佢會寒酸失禮。展館似飛船，船頂是空中花園，這個綠洲正是沙特的自身投射。館內無窗，以太陽能支援室內光源，船底透風流通館內空氣。還有全球最大1,600平方米的IMAX屏幕播放3D影片。
Don'tmiss：全球最大IMAX
位置：A片區（最近出入口：L2渡輪碼頭、高科西路）
英國館：夜攝目標場館
插滿6萬支膠柱的海膽球「種子聖殿」，內藏形態各異的種子，可像光纖般引光入室照明，膠柱更內置光源，夜間可發光變成奇異建築。
Don'tmiss：種子聖殿、夜攝場館外觀
位置：C片區（最近出入口：L6渡輪碼頭、後灘）
10個溫馨提示
入園水路免費
祖國人多武功強，世博會場如戰場，記住10個溫馨提示傍身啦！
1. 識揀預約機：入場務必找預約機約定5個當天想參觀的館。200台預約機分佈各入口位置，預期正門人流超多，可改到後灘、白蓮涇等入口找預約機。
2. 輕裝快審查：入場前須通過嚴密安檢，食物飲品腳架長傘全被拒門外，避免大背包。
3. 選定出入口：園區極大，務必事先計劃當天參觀的館，選定就近入口進場。
4. 搭車也搭船：選定入口後要計劃交通，的士和地鐵最方便，地鐵4、6、7、8及13號線都通往園區。亦設水路出入口4個，入園航線免費。散客可經東昌路水門入園，人流較少。
5. 世博的士：世博期普通的士不能入園，只有4,000台車身白、黃兩色的世博出租車能進園。
6. 上海八達通：買一張上海公共交通卡，乘公交、地鐵OK，搭的士都嘟得。
7. 實用手冊：到書報攤買本「中國2010年上海世博會官方導覽手冊」（RMB20），羅列場館介紹及各區地圖。
8. 夜票價平：想補影幾個展館夜景可買夜票，5pm後入場票價平一截。
9. 留意國家日：各國展館有自己的國家日，有特備表演節目。
10. 5月逼爆園：湊熱鬧當然家去，但剛開幕兼黃金周，一定逼爆園。6月是最佳時機。7、8月上海超熱，夠耐性9、10月最舒服。
世博套票
康泰推出「港龍上海3/4/5天自遊行」，機票、住宿連世博門票，包上海公共交通卡1張及「潮遊中國」旅遊指南，價錢由$2,739起。
康泰旅行社：21088888
