四年前，關楚耀以譚詠麟契仔之名加盟樂壇，前途無限。去年在日本涉藏毒案，卻換來四面楚歌，人生從此起了變化。
「返到香港，喺街俾人叫『吸毒嗰個』，我覺得冇面目見人，好想放棄自己。」
只是，他深刻反省，決定將嘆息化作動力。過去一年，他積極裝備自己：學結他、學鋼琴、學作曲，只求蛻變。
回歸樂壇首個專訪，特別剪了新髮型、精神奕奕的他見到記者，報以一個燦爛的笑容，再來一個擁抱，並說：「我返嚟喇！」 撰文：王連連
下午十二時，衣着整齊的關楚耀（Kelvin）準時坐在唱片公司會議室等候做訪問。放下一年工作，重新起步，新歌《一年》由他親自作曲，星期一正式派台，歌詞正是他一年來的心聲。預計8月推出全新大碟，正式回歸樂壇。
回首09年2月24日的荒唐事，只得輕嘆，Kelvin斬釘截鐵地說：「錯！我錯到不得了！初入行好順利，唱歌有人鍾意聽，身邊人對我好；不斷想做好啲，跟住壓力就嚟。好蠢！以為大麻可以幫我減壓，但冇諗過用錯方法，邊會諗到有咁嘅事發生，直至喺舖頭被逮捕一刻就知出事。仲係好大件事，入到拘留所，心情七上八落，好亂。後尾全香港人都知，成個人都崩潰，心諗冇啦，仲邊有路行！」
鐵窗生涯反思
與世隔絕的日子，Kelvin度日如年，鐵窗生涯記憶猶新：「有三個人同房，兩個同我差唔多年紀，另外一個似大哥哥。佢哋知我唔係日本人，對我好好，幫我同警察講我有乜需要。我哋用英文溝通，有時會講JackieChan（成龍）嘅事，但大部份時間我會睇書。我叫媽咪帶書畀我，睇咗好多中國歷史、經濟書，我唔想同外界完全隔絕。每日都有一個時間畀我去操場郁郁鬆口氣，一星期有幾次要幫手打掃。」
規律平淡的生活，難平Kelvin複雜的心情，越想前路心越慌，終日以淚洗面：「嗰時寫咗好多信畀屋企人，寫低我嘅心聲。但所有信我冇寄出，呢本notebook，家我仲有keep住。」33日扣押後，Kelvin跟父母返港，但選擇獨自出閘面對群眾：「我知道屋企人為我已經好疲累，唔想再影響佢哋，所以揀一個人行出機場。深呼吸一下行出閘，估唔到有咁多記者，家仲記得每個情景，記得每一個問題。」
跌低起身回轉
雖然有唱片公司同事、親友在旁輕扶鼓勵，但Kelvin仍不能原諒自己，最初不願抬頭見人，他謂：「我唔識點面對人，好怕。有幾個月冇出街，每日活動範圍只喺屋企廁所同房。好絕望，曾經想放棄，心諗都冇o架喇！人跌到咁低，點爬番起身？邊個仲會畀機會我？搞個爛攤子，只想避走香港，不如返加拿大，冇人識嘅地方生活就算！一係轉行揸的士，又考慮過做office，但同事會點睇我呢？」
Kelvin越說越落寞：「後來出街覺得人哋眼光同以前唔同，好自然耷低頭行。有次聽到行過身邊嘅人講，哦！我聽過，咪係吸毒嗰個囉！連我個名都唔講，關楚耀冇咗個名，變咗『吸毒嗰個』。我覺得好羞家，好醜怪。」唯一慶幸，Kelvin對毒品的心癮全部揮走：「嗰段日子只維持3、4個月，唔使調息喇。已經有咁大過錯，咁嘅下場，係咪仲有嘢唔捨得？一生人有幾多次機會？」
咬緊牙關，深呼吸一下挺起胸膛做人。Kelvin每天為自己打強心針，他說：「你知嗎？我家每日都同自己講呢句說話：Everythingisgonnabefine。」
家人朋友不棄
日本定食再好吃，那時的Kelvin也吃之無味，精神及心靈，全靠閱讀家人和朋友的信去支撐。提起家人，Kelvin即提起扶他一把的父親關維麟，說時口震震欲哭：「爹哋嘅信叮一聲令我打消所有負面念頭，連自己都唔相信自己嘅時候，佢信我，充滿信心話我知，我可以企番起身，之後我做乜冇所謂，但要我腳踏實地再嚟過。睇完我覺得有個光環喺身邊，照到我前路。」
母親為他奔波勞碌，往返香港日本探望，令Kelvin心痛不已：「媽咪要飛來飛去，我知佢身體唔好，仲要為我操心。扣留咗4、5日，第一次見媽咪，見到佢我心好噏。大家見面都唔知講乜，隔住玻璃窗，只得兩行淚。佢冇怪責我，一句都冇鬧，只係講你好嗎？佢關心我入面情況，我知佢都擔心我嘅前途。」
去年3月24日，是Kelvin的27歲生日，要待在拘留所跟陌生人度過，何來「慶生」？他說：「所有親人特登影張蛋糕相寄畀我，收到嗰刻好激動，感激佢哋為我做嘅一切。」以前Kelvin總嫌棄家人嘮叨，現在才知甚麼是珍品，這次教訓，令他懂得珍惜家人給自己的愛。
Kelvin續說：「仲有好多朋友、fans寫信支持我，冇丟低我。軒仔（張敬軒）、校長（譚詠麟）個個叫我唔使擔心，唔好亂，要我返嚟，一定有路行。每日我都拎啲信出嚟睇，提醒自己好多人喺身邊要爭氣。出嚟第一時間打畀校長，我喊到講唔到嘢，只係報平安。返港後我打畀軒仔，佢話細佬我點都撐你，我知令佢好傷心失望，家過去嘅就讓佢過去，希望佢哋迎接新嘅關楚耀。」
急凍愛情無奈
Kelvin和衞詩同是落難鴛鴦，故事發展迥異。後者被搜出行李有毒品、留案底判監禁2年緩刑3年，被唱片公司放棄，再踏舞台遙遙無期。相反Kelvin已整裝待發，新作《一年》將面世，歌詞中「可會痛恨我，可怪我癡心愛錯麼，看清楚這小風波，望着前路又幾多」道盡心聲。公司還安排Kelvin一浪浪的宣傳，8月推出自己有份創作的大碟，開展人生新的一頁。Kelvin坦言與衞詩仍有聯絡：「間中都有聯絡，但冇見面喇！都唔想公司失望難做。」
事過境遷，以為二人共過患難，感情會更堅固，本應更珍惜對方，是否因不讓公司再添麻煩才無奈分手，他低頭想一回說：「兩樣都有諗過，但當時大家都覺得搞番好自己嘅事業先；我連自己都未搞得掂，家間中問候吓，知道佢生活得好好就夠喇。佢信咗基督教，我知佢家好開心。」
後記：一晚長大
關楚耀「歸位」，唱片公司同事特別緊張。甚至打算今年不捧新人，把資源投放在他身上，因為大家也想他重生。各崗位的人做事也特別謹慎，上面的人跟上面的人密密溝通「幫吓手、錫住佢、寫好啲……」下面的人跟下面的人事先指明「女仔嘅嘢盡量唔好提啦！」正式埋位，Kelvin有問必答，被問到「女仔嘅嘢」時，更答得頭頭是道。其實各位「大人」或許太着緊，太周密的部署，其實不為意這「小孩」已長大了！
攝影：陳順禎
化妝：MichelleTong@Make360
髮型：Vanness@HairCulture
服裝提供：IssueCollection,Exitbyi.t
