滕麗名自08年同郭政鴻因為無綫劇集《野蠻奶奶大戰戈師奶》中一場啜爆戲，由拍檔升呢為緋聞情侶，但鴻仔舊年被踢爆原來早有妻女，外間即同情阿滕遇人不淑。
有傳阿滕一直對已婚嘅鴻仔未死心，兩人仍維持暗交，有周刊拍到鴻仔凌晨夜訪阿滕香閨，佢哋通宵密室談情，關係糾纏不清。又有指阿滕為呢段苦戀，曾向好友痛哭傾訴，情緒崩潰。
指斷章取義
噚日阿滕喺長沙灣趕拍新劇《怒火街頭》，對於同鴻仔嘅緋聞再被翻舊賬，佢好勞氣咁話：「可能我就有新劇《掌上明珠》出街，所以拎我啲新聞贈興，幫我宣傳，不過成日影響到人哋，我諗要同鴻仔講聲對唔住。我仲想講，我情緒冇問題，呢排不知幾開心，前幾日仲一班朋友BBQ。」
阿滕話自己雖中微博毒，但冇借微博向鴻仔傳情，佢話：「據我所知，鴻仔係冇開微博。」為咗啖氣，佢噚日又喺微博重申：「請不要再借我的微博斷章取義，多加幻想，傷害我的朋友。」至於郭政鴻，就至截稿前都未回覆。