兩個星期後就係5.16投票日，一次全港性五區補選慘遭政府壓迫，刻意冷處理唔落力宣傳，連呼籲選民投票都冇做到足，呢個政府真係失職。大家感覺唔到選舉氣氛，其中一個原因係因為街上冇乜候選人宣傳街板，事關保皇黨向政府施壓，唔肯拆除街板騰出位置，搞到候選人冇足夠位置掛街板，就算有位掛，都係啲唔起眼橫街窄巷山旮旯（粵音「山卡啦」）地方，掛咗出嚟真係搵鬼睇。港島區其中一個候選人陳淑莊獲選舉事務處分配約300個掛街板位置，其中兩個喺堅尼地城加惠民道加惠臺外路邊，呢個位置對正住宅出入口，風凉水冷本來幾搶眼，點知幫佢手掛街板嘅義工到場一睇，即時大嗌把鬼！
「係政府打壓手段」
原來掛街板位置並非面向馬路加惠臺大門，而係面向行人路，前面圍欄對落係個露天停車場，對出就係卑路乍灣海面。陳淑莊話畀呢個位佢掛街板十分離奇，事關呢條行人路平時冇乜人煙，對面馬路行人只係見到街板背面，咁搞法真係坐船嘅人先會睇到塊街板，仲要用望遠鏡先睇到，可憐街板被迫守海皮，真凄凉。
政府之前話即使保皇黨唔拆街板，都有人流多旺區位置畀候選人做宣傳，點知原來係吹水，是但求其搵啲位就交差，陳淑莊直斥政府用揦鮓招，「呢啲就係代表政府打壓補選嘅手段囉！」佢話當局畀咗大約300個街板位佢，由於部份實在太偏僻，掛上街板可能得烏蠅睇到，因此佢只在200個位掛街板，肯定影響選舉宣傳。
長毛街板位冇人行
新界東候選人長毛都面對同樣問題，據佢選舉總部工作人員稱，獲分配掛街板位置數目同上次選舉表面睇差唔多，大約700個，不過位置卻差好遠。以大埔為例，上次選舉喺區內最繁忙嘅廣福道有八個位置掛街板，今次僅得四個，數量大減一半，宣傳效果明顯打折扣。而且有啲位置喺鄉村，話係村口位置，點知到場睇睇，先至發現村民根本唔會用嗰條路出入，掛上街板收視率都係零，唔掛反而慳番選舉後拆板工夫。
mailto:[email protected]