結構工程師Ｔ在復活節假期到台灣一行，特別撥出時間搭高鐵，視察吓人哋嘅主要基建項目。據佢講，台灣高鐵之結構大有改善空間，一啲基建項目嘅建築水平，比香港差啲喎。中港台三地，建築安全系數以香港最高，殆無疑問，安全性高，建築成本自然亦會高一啲，有啲人專愛批評香港建築成本高，往往忘記了「安全」不是免費的，以治理「斜坡」而論，香港公認係世界級，不少外國工程人員特別來港觀摩。最近台灣發生斜坡山泥傾瀉事件，令人心寒，唔怪得吳敦義未上任做行政院院長之前，來香港一行，並與梁振英見面，就係為咗傾吓香港之斜坡營造喎。（呢啲係吳敦義講嘅！）
本港建築界近年因成本關係，唔用大陸建材就一定投標落敗，唔夠人爭。大陸建材平就平嘞，但品質是否可靠，原來要特別小心檢驗。據建築界傳聞，大陸不銹鋼有假貨，香港驗貨人員拆去一枝嚟驗，發覺「金玉其外，敗絮其中」，不銹鋼為面，包住假鋼為內，當堂嚇了一驚，全部退貨。左丁山聽聞之後，問老友記工程Ｃ，「點解唔買歐洲貨呢？」工程Ｃ話：「嘩，歐洲貨貴幾倍價錢o架！」
一啲工廠老闆就講過啦，大陸一啲工廠日間做正貨交畀外商，通宵做假貨自己去賣，有時真假難分，難以分辨。做假衫、假手袋，最多係唔襟用啫，但做假建材就可能害死人，釀成倒塌慘劇，罪過罪過。但國際建材近半年不斷漲價，令建築承包商頭暈，譬如上月巴西Vale與澳洲RioTinto等大鐵砂生產商，與日本達成鐵砂價協議，鐵砂價逐個季度報價，一開始就比去年加價九成之後，鋼鐵價無日不升，月月升，建築商難以估計落標價錢。前一個星期碰到大機構總裁Ｃ，同佢講起一啲基建項目嘅打價，總裁Ｃ話：「現時我唔理甚麼專家、甚麼專業QS（quantitysurveyor）嘅估價，總之嚟到我面前，我就將估價提升七成。三至五年後先至落成嘅項目，唔提高啲成本估計，就係不負責任，愧對股東！」咦，聽佢咁講，廣深港高鐵嘅成本點計？據講，特區政府會唔敢要求定價承包（因為建造商為咗保護自己，必定大大抬價），而係准許一啲建材以spot（現貨）價計算，希望在建造期間，價格有升有跌，可以平手達標。