周五23/04：紐記原來可愛啲
我哋呢類夜鬼，南美波一定唔係個杯茶，今夜焗買德國波。好嘞，膽選好史特加，單W也熱透，可惜串射德乙冠軍凱沙，呢隊波原來咁冇廉恥，輸畀弱旅羅斯托克，要押後慶祝攞冠軍，真係突然覺得原來英冠「1哥」紐記可愛啲。
閒贏指數：★★
周六24/04：睇阿曼戰敗興而回
日本波必係小弟搵食重心，今天好順，重心前鋒[-1]射鹿角半冷W俱得手。其實呢類要踢亞冠盃嘅強隊，賽前會醒神過舟車勞頓返嚟踢聯賽，宜備忘。中段，英國三級制曼聯、黑池同列斯聯全過關，只差黑池開唔到[-1]，但分注吸納，收穫算不俗。好醒神咁等睇阿仙奴對曼城，卻失望地返房瞓；睇波嘅樂趣，唔係想睇到艾迪巴約嬉皮笑臉、曼城零射門同阿仙奴僅剩半力，想贏無力。季尾波有時就係咁o架嘞！
閒贏指數：★★★★
周日25/04：貼中波種虛榮感，正！
畀到閒贏5粒星，當然唔止小弟追到個鯨魚完場前開W；唔係要牙擦，係貼中重心嗰種虛榮感有時勝過贏錢。賽前我同仙道彬講，開[-4]都會捧車仔！我認自己固執會追波，但係只會揀極具實力球隊。對上一個禮拜嘅悶氣全消，擂台做咗25天包尾，都彈上個「1哥」位坐吓，值得唱吓K慶祝吓啩。但今個月未倒數，仍需努力！
閒贏指數：★★★★★
周一26/04：唞足精神通頂睇歐聯
雖然自己係英冠躉，又早落注捧水晶宮搶分成功，今晚仲有西甲播；但係睡魔早call，莫非知我未來兩天會捱通頂睇歐聯？
閒贏指數：★★★
周二27/04：揸定宗旨有奧歷幫忙
季尾周不時有今天咁嘅戲碼，充斥垃圾波，但你無所事事，又會忍唔住買啲過吓心癮；亞冠盃戰意有疑點又落注，法甲冇關痛癢你又參與；好在小弟揸定宗旨捧里昂「大」同小注拜仁W，不過就贏得辛苦啲，要撐都尾。多謝奧歷！
閒贏指數：★★★
周三28/04：摩帥狂態掀另類高潮
好友成功置業，真係戥佢高興，住好啲辛苦啲都值得，可惜我倆夾份買馬只係打個和；食個晚飯飲杯啤酒回家等上網睇巴塞大戰國米。買咗[-1]半場已知不妙，急忙買番入球「細」。場波其實幾悶，不過睇賽後摩帥狂態已值回票價。
閒贏指數：★★
周四29/04：利記登場好彩冇掂
又係利記登場，不過我更有信心捧富咸，但當然唔買犯本上盤，博單W，又得咗！
閒贏指數：★★★★
值得跟進球隊：黑池（贏埋今周上尾班車）、車路士（乘勢要踩晏菲路）