立法會主席曾鈺成下星期六帶議員考察團坐高鐵去上海參觀世博，隨團記者噚日忽然接獲通知，中聯辦方面要求記者畀世博入場費，兩日合共356元，好多行家都好訝異，因為持世博大會記者證可免費入場採訪，質疑中聯辦方面亂收「附加費」好屈機。
入園採訪要356元
記者採訪議員到上海，機票食宿自理，但部份跟隨議員活動行程要另外畀錢，分別係583元高鐵車票連午餐及160元船票，令人費解係兩日入世博園區都要畀入場費共356元，因為今次到上海嘅記者大部份都有世博發出嘅記者證，持證可免費入園區採訪，既然持記者證可免費入場，有乜理由跟隨議員採訪卻要另外畀錢？旅行社濫收小費可以向旅遊業議會投訴，中聯辦忽然伸手，有行家慨嘆唔知向邊個申訴。被拒採訪世博嘅《蘋果》，今次好彩唔使俾人屈。