炒股如人生，順流逆流好平常，波動市謹記唔好自亂陣腳，要向前看，捉緊市場焦點搵避風港。正所謂逆水行舟，不進則退，邊個識時務順應水流，已經成功咗一半。
內地水流由政策主宰，逆水行舟，「實聽揸兜」。中央壓炒風只要一聲令下，內房超賣完可以再超賣，拖累埋銀行股首季業績都冇情講。反而受政策扶持嘅板塊通通強勢當旺，好似電訊設備、醫藥、航空、林木甚至電視電腦電話嘅「三網融合」主題，以至電影文化產業股，多成功在這場調整浪中避過一劫。
復星國際（656）旗下嘅復星醫藥剛公佈首季業績，歸屬母公司淨利潤大增91.3%至3.3億元（人民幣．下同），主要受核心業務好似糖尿及肝病藥等銷售帶動。國家計劃投入8500億元進行醫改，越嚟越多藥物將獲補貼。以內地市場為重點發展嘅德國拜耳預計，2013年中國藥品市場規模將增至800億美元，2020年達2200億美元。
中國森林賺少咗有因
唔好再周圍問點解醫藥股越升越有，追到氣咳，咳成咁不如入森林吸番啖新鮮空氣。除咗喺環保角度上吸收二氧化碳外，森林中最多嘅就梗係木材，而且賣得相當好價錢。
延遲公佈業績嘅中國森林（930），盈利急跌91.3%，不過放榜後竟然逆市升，原來係會計上美麗嘅誤會。公司08年於雲南平價買入林地資產，入賬時在估值便出現了較大一筆溢利，拉高咗08年基數，所以即使去年核心業務盈利增加81%，按會計準則卻錄得大幅倒退，靚女變豬扒。
喺政策扶持下，原來林木業只需交好少稅，採伐成本更低得離譜，就以中國森林為例，每平方米採發證只係50元，加埋向農民收購地價約200多元，總成本都只係300元左右，但平均每立方米木材售價卻高達1267元，毛利有七成幾，可見受政策支持嘅行業簡直有如中央為佢哋貼咗金箔。
胡孟青