商台同民建聯黨員一齊開咪做節目，高層聲言冇偏幫亦冇益民建聯，商台節目時段有價，任何政黨有興趣合作無任歡迎，仲搵民主黨卿姐做擋箭牌，事關卿姐都買咗時段宣傳5.2遊行，商台好公道咁話。
知情人士同八方講，實情卿姐今鋪俾人搵老襯，以佢用38,000元買下共700秒時間計，即係平均每秒要畀54元；民建聯花60萬元買下18集節目，每次4小時，即係共有259,200秒時段，均真啲，每個鐘頭扣番15分鐘新聞及其他廣告時間，都仲有194,400秒節目時間，除開平均每秒只係3元，賣畀卿姐每秒收54元，賣畀民建聯只收3元，即係卿姐買嘅時段比民建聯每秒貴17倍，咁都唔係明益民建聯？其他政黨要求贊助節目時段，有冇得要求畀「民建聯價」呢？