淡市搵股炒，有時都要上網八一八，昨日上某個財經新聞網搜尋，竟然大部份都仲講緊滙豐提款機盜竊案。試問呢類消息又點幫到散戶搵股去炒？以前就話有隻股份叫「信用卡防盜」，「股齡」尚淺散戶千祈唔好笑，如果隻股仍在，估計都有機會乘機大炒一轉。「信用卡防盜」幾年來變身多次，家陣叫國際資源（1051）。
港股走勢麻麻，入市策略建議吼實優質股份。新華文軒（811）09年度營業額32.09億元（人民幣．下同），同比升17.2%，純利3.59億元，升6.1%，每股盈利0.32元，派末期息連特別股息合共0.28元，息率達7.2厘，可見集團對股東仍然十分慷慨。
國家加快發展文化產業，客觀形勢有利新華文軒前景，而且集團手頭仍有現金及存款23.47億元，去年公司曾進行重組兼大舉併購，相信未來收購合併行動仍會陸續出現，業務做大做強，盈利前景甚值憧憬。新華文軒昨跌1.5%，收報4.58元，可吼位吸納，中線目標8元。
方星俠