一年一度之報業公會最佳新聞獎，四月二十六日舉行頒獎禮，由署理特首唐英年主持。新聞記者一年辛苦工作，最開心就係可以在呢日攞到獎，拿到大獎，履歷表似加上金漆，轉工轉行都容易有古仔講。不過攞到新聞獎，並非全部係記者功勞，如果編輯冇心機編排、起標題，美工冇心機設計版面，一篇報導好難起眼，吸引到讀者注意嘅。以現場展覽板上之得獎作品嚟睇，篇篇都係寫得好，插圖靚，標題醒目以及設計精美嘅作品，冇一篇係齋文字！可見得報紙早已有心為攞獎而下功夫，每年有計劃炮製十篇八篇好文章嚟參選，如無報紙老總下令或推動，好難咯。
今年拿得最佳新人獎嘅係一位女記者，名字叫做葉雅媛（YipNgaWun），係《am730》記者，以三篇特寫：〈投行賓架轉投義工〉（講黃元山）；〈炒燶外匯商罪科查榮智健范鴻齡下馬〉；〈記者+學者馮強〉─獲得評判青睞。頒獎之時，台下起哄，一班老鬼話：「唔係呀，葉雅媛係最佳新人？佢位公子已過咗二十一歲咯喎？」now電視嘅張志剛係葉雅媛同班同學（中大新亞新聞八○）笑到見牙唔見眼！最佳新人當然唔係八十年代嘅無綫新聞靚女主播葉雅媛啦，據《am730》執行董事馮振超講，此雅媛不同彼雅媛，係○六年港大中文系畢業嘅，一位不折不扣嘅八十後。聽一位編輯講，八十年代中，不少媽咪大概受到葉雅媛、陸嘉敏嘅影響，當時不少新生女嬰，以雅媛、嘉敏為名者，不在少數！
○六年畢業，今年攞獎，後生可畏，希望小雅媛繼續在傳媒捱落去。點解要咁講，因為主禮嘉賓唐英年署理特首致辭時講到，可能係新聞界人工低，有潛質年輕記者每每轉工，傳媒界青黃不接也。
邊位頒獎俾葉雅媛小姐呢？幾搞笑，就係比葉雅媛姐姐高一班嘅新亞師兄張樹槐（恒生銀行助理總經理）陪同報業公會副主席/葉雅媛姐姐嘅新亞師弟盧永雄頒獎，盧永雄身兼《星島》行政總裁，頒獎俾屬下《頭條日報》嘅勁敵，一啲都唔尷尬，冇所謂啦，《am730》老總盧覺麟係低一屆嘅師弟啫，好熟o架！報業公會理事/《星島》總編輯蕭世和（盧永雄同班同學）其後頒獎俾英文組最佳經濟新聞寫作得獎人《南華早報》嘅PeggySito，即係老公頒獎俾老婆，好溫馨啫。