英超季尾，車仔領先曼聯一分，香港政壇多紅魔躉，因此近日心情難免患得患失，反而車仔迷就風騷到震，八方聽聞白鴿黨內「天字第一號」車仔fans馬丁，近日向黨內「張李楊集團」（張文光、李永達同楊森）下戰書，開盤輸賭牙骱戰。盤口據講係咁嘅，如果車仔贏今屆英超，張李楊三請一請馬丁食一餐；反之曼聯奪標，馬丁一家請三家，張李楊可大吃一頓由馬丁埋單。張文光噚日同八方講，既然馬丁開到個盤口咁筍，佢最多畀三分一錢，梗係奉陪啦。不過佢強調請食飯都係其次，呢啲牙骱戰關鍵係贏「飛士」，冇理由俾馬丁咁得戚牙擦擦嘅。