本土行動成員朱凱迪近排少咗曝光，警方可能掛住佢，月初用咗一個比較特別嘅方法派人接觸朱凱迪，想搵佢傾吓偈。
朱凱迪噚日喺網上透露事件，稱今個月初有兩名大埔區警民關係組嘅警察上門搵佢，表示上司想搵人同佢「傾吓」。警民應該合作，不過朱凱迪覺得真係冇乜好傾，叫警員留低卡片就算。朱凱迪話事件奇在警方上門前，原來先致電屋主查探朱凱迪係咪住嗰度，仲知道屋主叫「盛哥」，搞到盛哥都好奇怪點解差人會有佢手機號碼。無厘頭有人上門尋釁滋事，八方覺得事有蹺蹊，朱凱迪卻話冇乜感覺，估計警察驚動屋主，可能係想藉此逼佢搬走，好在屋主懶理。