退役老總L於精壯之年辭咗周刊老總之位，雲遊全港大街小巷，尋覓地道舊式美食，去三星米芝連餐廳就唔使預佢，老總L每有所得，便求甚解，搵出美味煮食之道，方與讀者分享，睇佢食得咁投入，寫得咁有心，左丁山那怕是膽固醇極高之菠蘿油、煎腸粉，只要係老總L推薦，照吃可也。
星期日跑完女皇盃與冠軍一哩賽，還沒回到屋企，忽接老總L傳來短訊云：「我跟你左丁山專欄推介，買第七場，中了三重彩，十分多謝，請以後多多畀心水。」哦，嗰場左丁山膽粗粗話買四隻，8、5、3、6結果順序跑出5、3、6三重彩派三千八百四十元，算係幾好分。老總L想來係福至心靈，買四隻複式（本錢二百四十元），故此中到正，如果用8號「自由好」做膽，咁就喊都無謂。當日左丁山居高臨下，用望遠鏡睇沙圈，見8號「自由好」行得唔係咁自然，眼見最靚係5號步步穩，於是棄8取5，以5做膽兼買獨贏，僥倖得手。如果冇到場，憑紙上賽績，一定搵咗8號做膽，就會輸晒得個桔。
「步步穩」呢隻七歲馬幾怪，每年開季到季中都係無精打彩，但到咗四月就開始識得復甦贏大賽，今次已經係第二次贏冠軍一哩（上次係二○○七年），正是老而彌堅，趁有狀態，一於話報名去東京參加六月六日之安田紀念賽。記得○七年「步步穩」參加過安田，輸得好遠，今年取勝機會應該不大。但既然有日本方面邀請，練馬師大摩又好風趣：「馬主太太喜歡到東京shopping！」一於去玩吓啦。馬主李福鋆醫生（牙醫）係已故馬會主席李福深嘅哥哥，李太要去東京購物，話一聲就去啦，使乜同埋隻馬一齊去東京吖。李家兄弟在女皇盃大賽日夠威風，第一場就由李福和與兒子李國星嘅「滿高」爆出40倍大冷門。第七場一哩賽就由李福和堂弟李福鋆捧盃，第八場之愛彼錶女皇盃頒獎人就係李國能大法官，頒盃畀何鴻燊四太梁安琪，李家人才之旺盛出眾，暫時仲未在其他大家族見得到！次日，收到馬會宣傳單張，辦安田大賽馬主觀光團，六月三日出發，先到北海道浸溫泉，參觀育馬場（平時不對外開放），再於六月六日在東京競馬場貴賓廂房觀賞賽事，幾有吸引力。