似乎港股難逃「五窮六絕七翻身」之魔咒？希臘債務危機唔爆唔爆終須爆！外圍股市全線散檔，港股又豈能倖免？內地樓市調控仍未見收手迹象，連大陸股樓市況都未必掂，港股後市暫時肯定要捱。
雖然睇落形勢好似好淡，不過股市唔會一面倒係咁跌，最危險之時往往就否極泰來，所以散戶唔使睇到咁悲，大跌之後買貨風險反而相對減輕。星俠最想知就係之前咁多人嘈話買唔到樓，家陣個市開始跌緊，又睇呢班人會唔會去買？
淡市中揀當旺板塊股份去炒，勝算相對較高，不過同一板塊唔同股份都有強弱，好似近期軟件股以中國軟件國際（354）表現最好，另一隻市場普遍睇好之金山軟件（3888），表現就幾令人失望！今年以來走勢都係有波幅無升幅，但睇業績其實交到貨，去年賺3.87億元人民幣，同比升26%；但股價走勢就麻麻地，昨跌5仙，報6.12元，後市6.20元阻力好大，料要向下尋底，等跌落5.50元水平才考慮撈貨。
方星俠