政府千辛萬苦度咗條叫「9招12式」嘅絕世好橋出嚟，諗住可以紓緩吓香港人對瘋狂樓價嘅民怨，排解吓80後對官商勾結嘅憤怒，點知家隨時可能俾部港產片搞禍。
講嘅係彭浩翔編劇兼執導嘅《維多利亞壹號》，食正家全城最熱嘅話題，用極度血腥暴力嘅影像，控訴香港樓市嘅瘋狂。最夠噱頭嘅係，部戲係何家千金超儀首部投資嘅電影，仲做埋女主角，佢老公陳子聰係監製。大家都知，超儀伯爺何鴻燊係地產建設商會會長，即係地產商嘅利益代表，個女拍套戲嚟控訴老竇，夠晒爆！
「畀班地產商玩X晒」
咁都未夠，電影公司噚日同中大新聞與傳播學院搞咗場試映會，透過各大專院校同網上討論區派飛，招待班80後、90後年輕人睇戲，之後仲有座談會，請嚟中大學者、陶傑加埋超儀、子聰嚟同班80後、90後對談。
電影一開始就打出幾行字，列出回歸以來樓價升幅同市民收入嘅對比。超儀喺套戲入面飾演一個自細住喺舊樓嘅女仔，睇住鄰居個小朋友因為市區重建被迫搬走，夢想大個賺多啲錢，買間樓畀屋企人住。到07年佢大個咗喇，啲樓已經貴到黐線，佢不惜一切賺錢儲首期，點知業主撻定封盤，搞到女主角都黐埋……。
八方費事穿咗條橋，但套戲列為III級除咗因為殺人場面非常恐怖之外，亦好多粗口。飾演女主角外公嘅盧海鵬喺戲中話「香港就嚟畀班地產商玩X晒！」女主角阿爸徐少強就答話：「唔係就嚟，係一直都係地產商玩X晒！」
超儀噚日喺座談會上話，電影係想幫社會上被視為失敗者（loser）嘅年輕人同全港小市民大大力咁出一啖氣。八方忍唔住質疑佢身為千金小姐，冇經歷過買樓供樓嘅痛苦，家係咪名媛不識愁滋味，為賦新戲強說愁先？佢又點揣摩角色呀？超儀爆料，話雖然冇咁嘅經歷，但好多朋友包括彭浩翔都係樓市受害者，所以作為專業演員，演繹冇難度。
希望鄭汝樺睇呢套戲
八方又問佢有冇同老竇討論過樓市問題，超儀好幽默咁話，老竇成日叫佢投資就最好買樓，但佢自稱家名下物業「唔係好多」。有80後問佢會唔會請鄭汝樺同班發展商嚟睇呢套戲，超儀話都希望鄭汝樺嚟睇，仲好想到時喺現場睇吓鄭汝樺睇完之後，有乜反應。
港姐度三圍 妙喻縮水樓
套《維多利亞壹號》咁激，超儀噚日喺座談會上講到地產商賣樓奸招亦字字珠璣。佢話，發展商賣樓應該標明實用面積，仲用咗個幾妙嘅譬喻：「選港姐度三圍，都冇理由連埋個墊度。」陳子聰亦搭嘴話，好似去老蘭媾女，「帶返屋企之後先發現咁細嘅。」
陳冠希客串戲份全刪
套戲有唔少串星，包括陳奕迅、鮑姐、Juno等等，曾經話過無限期退出香港娛樂圈嘅陳冠希都有份參與。超儀話，佢同陳冠希模仿香港樓盤嗰啲又飛馬又歐洲葡萄園嘅浮誇廣告，拍咗段預告片，套戲入面本來都有啲片段，但後來剪晒。
導演彭浩翔噚日冇嚟，因為要帶住部戲喺外國參加影展，將香港樓市獨特之處介紹畀洋人，如果用京官嘅邏輯，即係唱衰香港。佢喺場刊「導演的話」度係咁寫嘅：「從小就有個疑問，幹嗎香港島四面環海，可是有海景視野的住宅，即使只有三、四百平方英尺，價錢還是貴得要命？那些住在半山的人，大概祖宗都在東印度公司年代就已移居香港，當個鴉片買手或洋行大班之類，早年得斂財致富暴發才能坐擁如此尊貴視野……殺人放火的勾當，一切都以自由市場之名而行。」
mailto:[email protected]
