希臘官方債務仲有3個禮拜至到期，標普已將佢主權評級降到垃圾級別，早前穆迪同惠譽已將其評級降至A3及BBB-。大市話咁快連環兩個下跌裂口，形勢比人強，推低容易過造上，短炒撈底慎防兩間評級機構再踩多腳。
希臘向歐盟及IMF申請最多450億歐元緊急貸款，德國反對聲音最大，擔心好似美國補貼華爾街大行咁，納稅人啲錢最終用嚟補貼當地公務員飯碗。呢次同美國救華爾街最唔同嘅地方，係希臘唔似得美國可以大舉印銀紙找數，惟有「揸頸就命」，聽候IMF發落。情況較似2月初杜拜事件，債仔自己明知冇事，卻要令全球虛驚一場。
應該係虛驚一場
呢次危機，最驚係好似金融海嘯時出現「傳染」骨牌效應。歐洲經濟雖然唔太好，但爛船都有三斤釘，根據IMF數字，整個歐元區去年國內生產總值有12.51萬億美元，較中東地區嘅1.98萬億美元多好多，即使係救希臘最壞打算要用1000億歐元，歐元區都唔係冇能力應付。
歐元區唔會坐視歐元再散落去，肯定會打救希臘，條件係要想法子㩒低目前佔GDP13.6%嘅財赤。快啲通過減赤方案係救希臘嘅關鍵，近日為咗減赤，當地公務員發起24小時示威，抗議政府打算削減聖誕同復活節花紅三成。
因為當地一般工資係以一年14個月糧計，除咗聖誕出雙糧，每逢復活節同暑假前都會出多半個月糧，突然大幅減薪，反對壓力之大唔難想像。亦係現時最唔明朗嘅因素，假如工潮升級，搞到機場等經濟命脈就大鑊。
希臘係衰，美國亦唔見得好好多，債務水平佔GDP達83%，歐元區16國則為78.7%，美股卻連升8周，唔通大家真係唔驚美國破產咩？
希臘去年人均生產總值2.96萬美元，遠高於南韓人嘅1.43萬美元，更加拍得住香港嘅3萬幾美元，減些少人工低低哋慣一鋪唔係咁難啫！
胡孟青