現年88歲的賭王何鴻燊，去年因跌傷頭住院221日，上月初終出院返家休養，昨日其女兒何超儀大爆賭王神速康復，不過養病期間要接受治療，重新學習咬字發音，擁頑強鬥志兼向來妙語連珠的賭王，已慢慢回復昔日的金句王風采，正等待適當時機重投Ball場接受記者訪問。
賭王何鴻燊上月初出院後，康復進度理想，閒時會在家打網球、看電視及到大宅的後花園散步，何超儀昨日指父親習慣了忙碌，因無法習慣閒下來的生活，加上對公司業務仍然十分關心，故在家養病期間，會傳召一班高層到家向他滙報公司業務發展，待他在信德的辦公室裝修好後，便會回復上班。而賭王四房的子女，近日都會輪流往探望父親。
超儀昨日指父親十分精靈，鬥志頑強，她說：「爹哋出院後，我都去探過佢幾次，佢精神好好，康復得好快，而且佢都係閒唔到落嚟，休養期間都會call人嚟屋企開會，睇佢進度好快可以返工。」
新年欲受訪醫生阻止
問到賭王何時可重返Ball場跟媒體再見面時，超儀笑說：「我諗佢都好想快啲可以出番嚟同大家傾偈，不過佢之前講嘢都唔係咁好，但經過艱苦嘅治療過程，佢好努力去練習，家講嘢咬字已經正番好多，連英文都講得好流利呀！我爹哋呢啲頑強鬥志，好值得我學習。」
超儀又爆老父現時最想做的事，是正正式式公開接受記者訪問，她說：「我爹哋一向好鍾意同媒體傾偈，但病咗咁耐，一直冇機會同大家講嘢，始終唔慣，其實佢住院期間，有兩次佢都好想落嚟同大家做訪問，一次係聖誕，一次係新年，聖誕嗰次佢突然換好新衫，同護士講要落樓做訪問，嚇得護士即刻通知醫生，醫生就話樓下太多人，怕混亂，最終唔畀佢落去。到新年時佢又自己梳理好，着晒紅衫話要落樓做訪問，但醫生仍然怕亂，唔畀佢出去。」
賭王當日雖聽從醫生勸告沒有現身，但還是希望讓外界知道其近況，所以他叫了超儀到醫院，要求女兒用DV機拍攝他說新年賀詞。超儀說：「記得拍攝當日爹哋吩咐人喺病房貼晒揮春，自己親自寫賀稿，錄影完仲識同護士單眼，好鬼俏皮。不過呢條片只係畀公司內部睇，冇正式公開。」
為回歸慶典緊張失眠
賭王一向關注個人儀容，超儀指其父去年12月為了出席澳門回歸慶典，竟然緊張得失眠幾天，她笑說：「當時爹哋好想出席澳門回歸慶典，所以一家人都冇阻止，為咗呢個慶典，佢緊張到失眠幾日，因為佢苦惱究竟要着乜嘢衫出席，到時要講啲乜。」
為力撐超儀的電影夢，傳聞賭王斥資一億讓女兒開電影公司拍戲，創業作《維多利亞壹號》下月5日首映，賭王也十分關注，更有意出席首映禮，對此超儀說：「爹哋佢好想嚟睇戲，想支持吓我，但我同佢講部戲好血腥暴力，怕佢會睇到暈，爹哋聽我咁講完，即刻話咁我唔睇啦！其實首映呢啲場合咁多人，佢嚟都唔係咁方便。」
採訪：陳月媚
賭王十大金句
賭王何鴻燊素有金句王之稱，風趣幽默的他過去經常在公開場合妙語連珠，絕無冷場。
No.1「我一滴都唔贊成！」
08年9月回應有關愛女何超瓊欲向前夫許晉亨借種一事時說。
No.2「若果係好質地，有商量，但Gilbert冇得傾。」
00年8月當面批評何超瓊當時的男友楊其龍質地有問題。
No.3「肥到着唔到襪！」
05年1月抨擊政府西九單一招標明益發展商。
No.4「要學蛇蟲一樣秋收冬藏，秋天同太太分房。」
01年11月賭王80大壽分享養生之道。
No.5「佢未有耐夠資格攞荷蘭水蓋，豆泥獎好心就唔好見報啦，簡直丟架！」
01年6月賭王公開批評麥舜銘，又稱他獲法國政府頒發的「一級武士勳章」是豆泥獎。
No.6「得咗全世界最邋遢嘅病。」
07年4月賭王就便秘灌腸內傷一事開記招交代病情。
No.7「我希望長壽啲，唔使150歲喇，120歲都殺。」
03年11月賭王公開分享82歲生日願望。
No.8「金沙咁驕傲，驕者必敗，呢次乜嘢架都丟清。」
08年11月發表對賭場競敵金沙裁員4,000人的看法。
No.9「走到氣咳，食到嘔凸！」
07年10月大呻每逢生日都要奔波幾房。
No.10「阿三（陳婉珍）就個個女都靚，阿四（梁安琪）大女（超盈）就麻麻。」
07年12月公開逐一品評自己各房女兒的樣貌。
資料來源：《蘋果》資料室
娛樂資料庫：賭王出資 超儀專拍三級片
賭王本打算下月出席何超儀的新作《維多利亞壹號》首映禮，但最終因電影血腥暴力打消念頭。有傳是賭王去年出資一億元，支持超儀成立852電影公司自行開戲，由彭浩翔執導及超儀主演的驚慄三級片《維多利亞壹號》便是該公司的頭炮，超儀扮演殺人女魔頭，全片斷手斷腳超級暴力。
至於麥浚龍（Juno）與日本AV女優蒼井空合演的三級電影《剖術者》，同樣是超儀的電影公司開拍，Juno在片中飾演一個變態戀物狂。
