舊年11月，三萬幾個小學生以一人一票選出雞蛋仔係本港最地道嘅食品，當時喺現場睇點票、人稱芳叔雞蛋仔嘅鄭華芳當然好激動，心中已經有一團火，想將雞蛋仔提升至另一層次。芳叔閉關鑽研半年，終於成功炮製全港獨創嘅「芳叔升呢雞蛋仔」系列，噚日打頭炮叫做「地獄鬆鬆」麻辣肉鬆雞蛋仔。
入行餅廚40幾年嘅芳叔話啲客越嚟越嘴刁，鍾意試新嘢，傳統雞蛋仔都要創新口味。四周圍去旅行，見四川麻辣火鍋好受港人歡迎，諗諗吓巿面冇見過鹹嘅雞蛋仔，咪好大膽咁，試吓將麻辣火鍋同雞蛋仔crossover。
陸續推三款新口味
麻辣雞蛋仔嘅做法比傳統複雜好多，要將麻辣粉混入蛋漿，又加入辣肉鬆做餡料增加口感，「反覆咁重新調校烘焗雞蛋仔嘅時間同熱度。」芳叔話家先推麻辣雞蛋仔，之後有日本宇治綠茶紅豆雞蛋仔、意大利香草蒜蒜雞蛋仔輪住出場，「每兩個禮拜推出一款，不斷畀啲客驚喜。」
芳叔講得興起，一口氣炮製咗三款雞蛋仔畀小妹試食攞意見。小妹先試食麻辣味，一口咬落，辣辣哋、脆脆哋，幾香口，再嗒多吓，成條脷麻晒，好鬼激。綠茶紅豆雞蛋仔好香綠茶味，加上暖笠笠嘅十勝紅豆，幾啱我哋啲女仔。香草蒜蒜雞蛋仔好惹味，用鐵模一烘，啲香味濃到塞鼻都聞到。升呢雞蛋仔只係限中環店有得賣，供應時間下晝3點到7點，價錢每底由16蚊至20蚊不等。
電郵：mailto:[email protected]