英格蘭國家隊領隊卡比路初頭企硬，唔畀班國腳啲老婆同女友（WivesAndGirlfriends，簡稱WAGs）隨隊到南非戰世盃決賽周，但家吓又轉軚，應該會畀佢哋去。班女幫唔幫到英軍，我求大俠唔清楚，但應該會上演一場「宮心計」。點解？碧咸老婆維多莉亞唔喺度，朗尼太太高蓮同謝拉特太太居倫，仲唔趁機爭做WAGs大家姐咩。
猶記得4年前德國世盃，英格蘭班WAGs喪蒲喪買，俾英國啲小報煲到大一大，搞到連國家隊形象都差埋；為免歷史重演，卡比路原先向WAGs落禁賽令，但見意大利上屆捧世盃時都有班女人喺身邊，諗諗吓都係覺得俾班球員帶埋女人去，對班波先有着數。卡比路話：「球隊士氣好重要。我同納比傾開上屆意大利攞世盃，佢哋班球員間唔中有放假，可以同家人敍天倫；而且，每場波之後佢哋都會搞燒烤會，咁做有助提升士氣。有時呢啲嘢就係贏波關鍵，作為領隊應該明白邊啲嘢對隊波好。」
謝拉特朗尼嫂爭上位
講開英格蘭班WAGs，由於因腳踭受傷而要唞到11月嘅碧咸，應該只能以大使身份隨隊到南非戰世盃，即係話佢老婆維多莉亞九成九唔會再係WAGs嘅阿頭。本來雪露最有機會接棒，但佢同艾殊利高爾鬧婚變。所以朗尼太太高蓮同謝拉特老婆居倫，最有可能出嚟統領WAGs。
朗尼已成為英軍最重要球員，連帶高蓮地位亦提升；加上高蓮近幾年走才女路線，俾人覺得好有智慧。至於居倫嘅老公謝拉特喺英軍舉足輕重，而且論外形比高蓮煞食、個樣又壓到場，加上4年前已同維多莉亞爭做大家姐，所以今次唔爭做WAGs阿頭就假。呢場WAGs版宮心計應該一觸即發，但睇佢哋勾心鬥角時，順便可以埋靚女，事關高治另一半艾比同禾確特女友美蓮妮都相當省鏡，球迷記住留意呀！