中國絕對是天字第一號山寨大國，連堂堂上海世博會主題曲都是東瀛老翻，有辱國體。山寨版何止主題曲？Twitter在中國遭河蟹但「新浪微博」上位，成為中港台演藝界文化界最潮玩意；有專家說透過微博，能近距離和內地同胞交流，收窄文化鴻溝，假若閣下唔想入世博逼餐懵，不如轉玩微博，一樣能夠認識祖國。
記者：蔡俊業
攝影：楊錦文
場地提供：TC2Café&Workshop（油麻地砵蘭街106號地下/23889772）
韋小婷
原名尹瑋婷，GuruOnline副總監，專責社交網站的公關推廣業務。2009年起以「韋小婷」之名在《信報》及財經雜誌《iMoney》撰寫專欄。
粉絲：86/關注：102/微博數目：92
http://t.sina.com.cn/waisiuting
許廷鏗（Alfred）
港大牙醫學院學生，曾奪第一屆《超級巨聲》「最強人氣獎」，有「將軍澳吳尊」稱號，平時以Facebook及微博與粉絲聯絡。
粉絲：3,156/關注：58/微博數目：40
http://t.sina.com.cn/n/alfredhui%E8%AE%B8%E5%BB%B7%E9%8F%97
近距離接觸同胞
即係咁，本來打算到上海世博園打個白鴿轉，但近日睇新聞，又要搶飛又要同幾十萬人逼，確實恐怖，連埋機票酒店幾千蚊實在唔抵！其實，有人說到世博可以了解最新國情，但中國地大物博，「國情」二字無邊無際，既然如此，在iPhone玩微博和內地人打打牙骹不是更快更化算嗎？如從事SocialMediaMarketing的韋小婷，當初因工作需要而玩微博，Update一下藝人動態，但玩玩吓，又發現無形間和內地人距離拉近了，「因為係簡體字，以前真係一年去一兩次內地網站，但家唔同，一睇微博，㩒入去就係內地網站，你睇嘅視頻唔係土豆就係豆瓣，變咗同內地好接近，而吸收資訊亦都以內地為主。」
包括月初發生的青海大地震，對她的衝擊很大，「Even係汶川大地震對我都無咁大衝擊，始終嗰次喺報紙同網站睇到地震新聞，我自發Click入去睇，但喺微博世界，唔需要Click入去都會自己彈出嚟，令到一啲好似好遠嘅事，同我生命連埋喺一齊！」她解釋，地震發生後，內地網民自發在微博戶口的個人大頭照中掛上綠絲帶，情況跟去年伊朗政變，全球各地的Twitterer（或稱推友）將大頭照轉成綠色力撐當地反對黨革命一樣。「我見到就立即跟住掛埋一份，風氣轉變咗，係我去follow內地人，ratherthan佢哋追隨香港人，以往香港係扮演領導角色。」
內地留言更有建設性
小婷的同業─AGENDA傳訊策劃總監梁志成（Rudi），早在農曆年開始已接觸微博，比小婷開始得更早。對於利用微博了解國情，他有更深入的分析，他說香港人對內地人的認識，絕大部份都是來自旅客又或者返深圳揼骨，較為表面，「其實好多內地人很熱衷發表意見，喜歡分析，提問亦很有質素，相反香港人留言多數都只會講『哈哈』，無建設性意見，有啲內地人如果你唔回覆佢嘅留言，佢會嬲！」會嬲就真係誇張咗，但小記亦有近似經驗，早前在微博發表過一些關於謝安琪上《亞洲星光大道2》做嘉賓，回覆的絕大部份都是廣州的網民，而且話題由歌手打破無綫壟斷，慢慢談到香港電視業的發展和困境，可以說我從沒試過跟內地人可以作如此深入的討論，微博的確為你我提供這個平台。
對於小婷來說，上微博的最大得着，莫過於提升自己的簡體字水平，「一係唔睇，一睇先知自己原來咁多字唔識。」至於自言很喜歡簡體字的商台DJ朱薰也認同「對用同埋睇（簡體字）都有好大幫助，因為你用得微博就一定要識得睇。」此外透過瀏覽微博短訊，朱薰亦學會不少內地用語。「例如『很牛』、『好雷人』都係指好勁好犀利，都係用微博之後先識！」朱薰暫時仍然用繁體字輸入，但小婷就等不及了，「我下載咗QQ拼音去打簡體字，但其實好多嘢都唔係好識，希望佢哋明白我講咩，Follow內地係trend，叫自己做『圍脖』，或者『童孩』，而ratherthan用內地本土嘅字眼。」不過，要強調的是，微博始終是雙向溝通，在我們學習到內地用語時，彼方一樣領略到廣東話精妙之處，所以我用微博發訊息時，照舊用廣東話，或者書面語，內地網友同樣明白無阻隔。
除了能夠近距離與內地人交流之外，不得不提微博熱對市場推廣的衝擊，包括最需要曝光率的藝人，許廷鏗：「之前用過Twitter，但嗰邊啲人比較Cool；後來朋友話『你應該玩微博喎！』，因為內地市場好大，而微博上回應又好快。我亦都想知道內地人對我嘅評價係點，因為《超級巨聲》喺內地都有播，其實之前喺Facebook都試過收到來自廣州嘅Privatemessage，咁我諗，內地唔係個個都可以上Facebook，轉用微博就更加方便啦！」就係咁，Alfred就開設咗微博帳戶，他說，很多時都會靠微博發短訊通知粉絲他將會出席甚麼場合，粉絲們回覆得極快，像訪問期間我要求Alfred拍一張相放上微博供影相之用，不足數分鐘已有數人回覆：「好靚仔呀！」「篇報道幾時出呀？」就知道微博的宣傳速度和威力。
改變宣傳生態香港落後
截至3月，新浪微博全數用戶僅500萬但已有不少藝人、文化界人士甚至私人企業採用，Rudi：「例如《青海地震大匯演》咁，因為微博係一種manytomany嘅工具，所以當演藝界一吹雞話要做，只要搵到其中一班最多微博粉絲嘅藝人宣傳開去，好快就會叫齊人！其實好多歌手嘅聚會，家已經唔使透過傳媒發佈，由佢自己喺微博發佈，等Fans傳開去，例如何韻詩！」朱薰也認為微博出現，令到藝人宣傳時更能反客為主，「好多時聽啲歌手講話為宣傳新歌而接受訪問，但訪問出街好多時都係講咗第二啲嘢，家佢哋就可以用微博集中講音樂。」而她自己亦會透過微博為節目做宣傳，「早前洪卓立上咗《兒童適宜》做嘉賓，我都影咗相放上微博，然後叫人留意播出日期。」電影《志明與春嬌》上映初期票房麻麻，但靠余文樂等人用微博不斷發訊息宣傳後，越來越多人捧場。
小婷說，論宣傳效益，微博比任何一種社交網站都要強，所以特別適合一些香港品牌：「我諗咁多個Tools，微博一定係最煞食，包括電視、雜誌都係『天價』，但微博只要請幾個人就可以做到Marketing，例如海港城搞青海賑災，平日商場點樣做效果都係有限，但家成件事就係拋入去內地市場，亦毋須Call內地傳媒嘅採訪，內地人一上微博就知佢哋發生緊咩事。」她說，海港城絕對是懂於利用微博宣傳的香港公司，在微博價值榜中排名85，是眾香港公司首位。Rudi更指出內地不少公司，例如廣州《新周刊》會將最新一期內容透過微博發放，「如果見到內容吸引的話，我會買嚟睇，相反香港公司仍然很少人願意免費供應內容，好落後！」
經過兩個月日玩夜玩，商台朱薰已晉成為「微博大師姐」。
粉絲：15,542/關注：170/微博數目：557
http://t.sina.com.cn/chufun
微博YESORNO
（1）僅新浪提供微博服務？
不是，還包括網易微博和騰訊微博等，估計現時微博客用戶數目逾千萬。
（2）有「V」字一定真？
朱薰說：「Stephy最初開微博時，發現有另一個Stephy攞咗佢個V，後尾先搞掂。」小婷說：「品牌申請V要寄資料去北京，個人就無咁複雜，但又唔係亂咁哌！」
（3）只用簡體字？
沒有限制，小記曾經在微博問內地網友，他們都說沒有這個必要，反而覺得繁體字字體優美更好看。
毒奶粉一案，梁詠琪在微博撐被判入獄的維權人士趙連海後遭河蟹，後來杜汶澤聲援，落得同一下場，被刪訊息。他接受訪問時說：「中國家真係一個世界強國！」
