殿堂級武俠小說家金庸獲藝術發展局頒發「2009香港藝術發展獎」終身成就獎，署理特首唐英年噚晚做頒獎嘉賓，盛讚原名查良鏞嘅金庸係著名文學家同學者，博通古今，涉獵極廣，創作嘅武俠小說構思精奇，歷史、哲學、文學共冶一爐，為武俠小說開創一片全新天地。
金庸小說廣為傳誦，喺華人世界有巨大影響力，唐英年指多年來都係電視劇、電影、舞劇、動畫片以至網上遊戲等文化創意產業取之不竭嘅題材及創作泉源。
係最高榮譽
金庸創辦《明報》，寫嘅社論十分有影響力，唐英年指佢係出色新聞工作者同社會活動家，對香港社會發展建樹良多，更體現咗香港喺創作自由、保存和弘揚中國文化藝術方面嘅獨特作用。
「終身成就獎」係藝術發展獎最高榮譽，之前有兩人獲此殊榮，分別係07年頒予名伶白雪仙，08年頒予國學大師饒宗頤，金庸係第三個得到最高榮譽嘅大師。藝發局指獲此獎項者，必須具社會認受性，喺藝術領域上具卓越成就，入選名單由藝發局委員及藝術顧問提名，最後由大會推選產生。