北京車展舉辦得如火如荼，國產土炮力拼歐美大廠，有無因主場之利嚐到甜頭目前仲難以定奪，起碼幾架國產概念車真係幾有創意，值得加分。歐洲大廠當然出盡力爭曝光機會，而且越嚟越多大廠新車喺中國車展內作世界首發，而福士集團更設下中國參展以來最大規模嘅場館，旗下六大品牌聯手出擊，佔地達9,326平方米。除咗VW旗艦級Phaeton同AudiA8L當然搶，不過我就對呢部小靈精「Bike.e」更有興趣。呢架嚴格嚟講都算「電」單車嘅Bike.e，屬概念產品，外形纖巧收身，電池同摩打收藏得相當巧妙，叉滿電可行走20公里，速度又係20km/h，連車重都玩埋，20kg，齋睇數字已經好有噱頭。車身可摺叠收藏，所佔空間極小，最啱擺喺車尾箱，閒時就攞出嚟揸。
記者：徐影龍