同北京奧運一樣，上海世博老早成為市場預期之必炒概念。公道地講，年內所謂世博概念股表現唔算搶眼，家陣世博開幕已近在眉睫，唔少散戶依然唔死心，睇緊仲有無得搞。
錦江酒店（2006）日前公佈09年度業績，只賺1.19億元人民幣，按年倒退56%；由於估設世博入場人次高達7000萬人，所以，錦江管理層對今年酒店業前景感樂觀，估計今年整體出租率會比去年多6個百分點。
錦江本月初一度創出今年高位2.80元，惜難再寸進，表現轉呈反覆，昨日跟市跌0.02元，收2.60元，陰陽燭圖似在營造旗形走勢，惟技術指標卻唔見有勢；如錦江股價有力突破旗形炒上，預期新高在望，後市料可挑戰3元過外；相反，後市若未能成功衝破高位2.80元延伸而落之下降軌阻力，則估計股價要下試50日線約2.50元支持，家陣揀錦江博炒受惠世博概念，值博率僅五五波。反而世博展期幾個月，等有相關數據出台後至揀股來炒，可能更值博。
方星俠