樂施會今年初忽然畀中共教育部封殺，指負責人係「反對派骨幹」，舉辦內地大學生實習計劃陰謀滲透，樂施會無厘頭被扣帽子十分懸疑，該會董事局副主席陳智思噚日出席籌款宣傳活動時話，該會在西南旱災同青海地震救災工作冇受阻撓，但至今仍未搞清楚教育部搞邊科。
陳智思噚日向八方申寃，話樂施會清白過白紙，「如果真係反對派骨幹，我同梁愛詩（董事局成員）一早走咗啦。」佢話封殺消息傳出後，好多捐款者查詢，恐怕支持反對派作反；佢向北京同中聯辦了解，可惜無明確答案，「教育部一直冇人出嚟講過嘢，中聯辦高級官員好認同我哋嘅救災工作。」樂施會已腰斬今年實習計劃，再辦無期。