政府銳意將香港打造成藝術樞紐，明年中落成嘅添馬艦新立法會大樓都要擺啲藝術品附庸風雅。立法會今日起至6月28日為新大樓徵集四件藝術品，歡迎本地藝術家自薦，首要條件係原創，不能學似上海世博咁做A貨或山寨嘢，亦要配合大樓環境同景觀，反映立法會莊嚴形象。
630萬買四件藝術品
要如何反映莊嚴形象？八方覺得好抽象嘅，不如實際啲，四件藝術品可唔可以帶有政治色彩，例如紀念六四收唔收貨？立法會主席曾鈺成冇講明，只係話唔應該訂立框框窒礙創作自由，會由一個包括議員、本地、海外藝術家、建築師以及公眾組成嘅評審委員會挑選藝術品。
大家咪以為過咗評委會一關就得，事關藝術品最終可唔可以放喺新大樓，必須得到立法會行政管理委員會批准，即係議員才有最終話事權。藝術品好壞好主觀，價值更加冇譜，立法會預計用630萬元添置四件藝術品，八方唔敢話立法會出手低，不過以現時市道計，恐怕難與內地同胞嘅人民幣競爭，與其將價就貨，八方建議立法會應該主動珍藏本地創作。
要數本地最知名行為藝術家，古思堯肯定榜上有名，佢自製嘅棺材，絕對係本地原創精華，手工一流而且意義深遠。須知道阿古並非亂來，棺材係為悼念六四死難者而製，諷刺下令屠城嘅人靠人血升官發財，如果領導人來港，佢唔會抬棺材示威，而係抬自製山墳，寓意屠夫愧對人民，最好早日歸西。
原創作品首選張廿蚊
立法會係反映民意機構，最能夠代表香港民意嘅雕像，本應係皇后像，但為免被指政治不正確，八方推介在新立法會大樓外豎立民主女神像，有冇人反對？藝術品要反映時代意義，近日最流行嘅原創作品首選張廿蚊，充滿小市民控訴無良老闆嘅張力，見者無不動容。若要有啲品味，可考慮普普藝術香蕉畫，一隻蕉改變了香港議會文化，毫無疑問史上留名，立法會豈能不珍藏？
mailto:[email protected]