白姐姐果然唔係浪得虛名，參加補選矢言追擊毓民，選戰甫開始已經逼到埋身，真係唔講得笑。港大民調顯示白姐姐支持度有11個百分點，毓民有27個百分點，係五個辭職議員中，唯一唔係穩陣重返議會嘅人，社民連可能自知有暗湧，即時發力拯救毓民。
社民連新鮮出爐《公投號外》（圖），最快今日派出街，主席陶君行不願評論是否為毓民告急，強調選情不算樂觀，預期抹黑攻勢陸續有來，佢研判選情可能會有好大變化，因為唔知白姐姐後勁有幾凌厲。今期《公投號外》內容主要係反駁土共、保皇黨針對公投嘅謬論，列出支持公投嘅理論，向市民解釋公投嘅作用同理念，仲有唔少篇幅講述各國公投歷史同發展，唔理解公投嘅市民，睇睇應該獲益良多。
呢份號外大約印10萬份，陶君行稱在三區派發，每區平均3萬幾份，相信輕易清倉。